象牙街嘅前世

        广州地理

        □  邓树群

        南都新闻近日提到广州象牙街嘅竹筒屋修建，令老广州再次忆记起以象牙出名嗰条街过去嘅威水史。唔少现代市民以为大新路就系象牙街，因为岭南象牙民间工艺、加工贸易从清末起喺呢度旺盛过上百年，后来大新街几乎成咗广州雕刻工艺嘅标杆符号。但系，从清末追溯到明代，呢个行当实质上发源于象牙街。

        象牙街东起解放中路，西至走木街。世代居于此地嘅梁伯讲，起初街名叫山茶街。明朝嗰时，呢度一带仲系江边，南来北往嘅船只都喺度停泊码头，四乡山货、南洋奇珍异宝由呢度上岸交易。后来，海外优质象牙亦在此入街，艺匠将象牙加工成各种精美嘅牙雕艺术品并开铺买卖，慢慢就形成咗市场，出现几百家店铺，成行成市。繁荣时期嘅地盘除咗象牙街，仲有象牙巷四条，以及象牙北街等支线，可以想像当时几咁繁华。

        明代后两三百年间，象牙街慢慢向附近嘅大新路迁移。清朝末年，一批自立门户嘅艺人成立“大牙行”，选址喺大新路嘅小新街，人称“象牙会馆”，亦系中国最早嘅专业馆所。而由嚟已久嘅象牙街巷，慢慢淹没喺市井之中，只剩下街巷名字。

        近几十年，大笨象成为世界性嘅一级保护动物，国际上禁止象牙交易，象牙雕刻生产式微，著名嘅广州市大新象牙工艺厂亦从大新路搬到天平架。原厂长洪先生向笔者透露，虽然厂名仲有“象牙”，但已经以猛犸牙替代象牙雕刻。曾经辉煌并名满天下嘅象牙雕刻艺术品，以及象牙街却作为一段历史嘅见证留畀今天和以后。