唔怕衰口臭

        企喺边度

        □  麦荣浩专栏

        人生呢个游戏真系好奇怪，有啲嘢，大家都知道有唔妥，但总系冇人会出声。点解？香港有句话，叫做“讲得多，衰口臭”，即系话，有啲野，虽然全世界都知道系真话系真理，但当事人一定会觉得唔啱听唔想听；你夹硬要讲一啲人哋唔啱听唔想听嘅真话，等同你有心搞到人哋唔开心，搞臭个PA  R  T  Y，衰口臭！

        早几年，喺香港，有次同一个靓女聚旧食饭，佢话最近有人狂追佢，系我一个老友，问我点睇。当时我真系唔识答。我呢位老友，喺圈子入面一直有个秘密，就系佢好早就结咗婚，有老婆嘅。我到底应唔应该为正义踢爆我老友？但问题系，个靓女早前畀仔飞伤得好深，佢而家根本好享受畀我老友追，觉得我老友系一个几唔错嘅盘，有机会成为结婚对象。如果我呢个时候同佢讲我老友有老婆，会唔会衰口臭，得罪晒所有人？最后我都系讲咗个真相出嚟。个靓女同样系我朋友，如果我唔讲，即系明明见佢跌落水都唔提醒佢，噉我即系帮凶。后嚟个女仔嫁咗个好男人生活幸福，证明我当日嘅决定冇错。

        嗰日行经昌岗路嘅一块空地，有健身课程销售经理对住几十个员工训话：“你哋呢两日嘅销售成绩唔好！今日一定要畀压力自己！今日之内，每个人都要做到三千蚊生意！如果做唔到，你哋就要自己贴钱！自己花三千蚊买公司嘅产品！”咦？唔对路喔。噉仲算系销售员培训？根本就系传说中嘅洗脑传销大法啦！光天化日喺广州市区大大声声搞啲噉嘅嘢，竟然唔惊畀警察听到？我正想去踢爆呢个传销佬，身边个FRIEN  D拉住我：“你系咪傻口架？你真系当你自己活喺童话世界？”

        “条友能够日光日白大街大巷搞传销，即系代表佢哋好淡定好自信有恃无恐。你走去踢爆人，系咪当自己打得过李小龙黄飞鸿霍元甲？”我话：“如果班后生仔后生女系喺偏远地区嚟广州打工嘅，畀无良传销呃晒啲钱，喺广州又冇人冇物，噉咪死得人多？”个FRIEN  D话：“边个话你知班后生仔女一定好无知唔知发生紧咩事？讲到底佢哋都觉得做销售比做其他工作赚得多，有一个发达嘅希望。边个话你知里面全部系初嚟广州打工嘅外地人？我觉得想加入呢类队伍嘅广州仔女都唔会少。”佢拉咗我入地铁站：“我唔系叫你咩都唔好做。如果你唔嫌口臭，你就喺你嘅专栏写出嚟，等大家警惕下啦！”