怀念萧岗菜心

        广州往事

        □  贺远宁

        广州白云区有个地方叫萧岗，呢个城中村系好多广飘族栖身嘅地方。但系大家知唔知道，佢以前因为出产“萧岗菜心”而出名。

        关于萧岗菜心，旧时流传住一个传说。话说南汉刘岩称帝嗰阵时，皇帝大建宫殿、热衷选美，搞到大家心惊惊。当时有两个村姑，一个叫柳娥，一个叫叶花。佢哋都唔想入宫，就匿埋喺萧岗村嘅烂庙入面。为咗生活，两个人喺庙旁边嘅碧雨潭开荒种菜。因为冇钱买菜种，地开出嚟之后，只好摘啲嫩柳枝插喺地里面嚟种。天上嘅观音菩萨知道佢哋嘅遭遇，于是洒啲圣水帮助佢哋。讲起来真神奇，柳娥同叶花种嘅嫩柳，第二日竟然变成一棵棵又绿又嫩嘅菜心。两个人鬼咁高兴，摘咗几棵煮嚟试下，觉得又嫩又脆，佢哋将菜心卖畀人哋，食过嘅人都话好食。后来，佢哋又将菜种送畀附近农民种植。大家用白云山泉水淋菜，菜心越种越靓，就喺萧岗出咗名。由于呢种菜青骨柳叶，又系柳姑娘同叶姑娘最先种嘅，所以叫做柳叶菜心。用柳叶菜心炒菜，香甜爽脆，入口冇渣，仲好有菜味，所以萧岗菜心闻名全市，深受市民嘅欢迎。

        而家，萧岗已经变村为街，菜地已经冇晒，当然种唔出菜心。周围起咗好多出租屋同商铺，头顶嘅电线拉到蜘蛛网咁密，时窄时宽嘅水泥路，通向村嘅各个角落。呢度住咗10万嘅外来人口，环境比较差，旧时嘅田园风光，已经睇唔到喇。

        谂起嚟，除咗萧岗菜心，广州旧时仲有好多著名嘅农产品，好似花地杨桃、茶滘沙榄、萝岗甜橙、夏茅香芒、大塘石榴、泮塘五秀……随着城市化嘅推进，而家呢啲好正嘅老字号农产品通通冇晒踪影，你话系唔系十分可惜呢？我哋都好想知道，仲有边个嚟保护佢哋呢？