麦当当呀麦兜兜

        企喺边度

        □麦荣浩

        1990年代，无线电视开始觉得喺自己嘅电视剧影到人哋嘅产品等同无端端畀着数人；于是乎，电视剧里面无论系一罐啤酒定系一包花生，一定谂办法遮住个牌子，总之无畀过赞助费一定唔会畀机会你“广告植入”。但求求其其贴张纸遮住牌子名实在影响美感，所以近年识得花心思，自行制造包装纸包装袋将啲道具改头换面。嗰日喺电视剧《爱·回家》，见有个熟口熟面嘅外卖纸袋，写着“D  D”。直到演员话自己买咗“麦当当”，我先明白，D  D指嘅系招牌上有个M字嘅麦当劳！

        1980年代嘅香港小朋友，习惯叫麦当劳做“麦记”。点解？因为香港啲街坊铺，无论茶餐厅士多定系五金铺，好兴叫咩记详记。我哋将麦当劳当成街坊嘅一分子，好自然就叫佢做麦记。九十年代尾，麦唛麦兜漫画面世，见佢哋得得意意，我哋钟意用B  B话叫麦兜做麦兜兜，顺便将佢嘅亲戚麦当劳叫做麦当当。

        1980年代嘅香港小朋友，可以话系同麦当劳一齐成长嘅。小朋友首先系畀佢嘅真人版卡通电视广告吸引。当时嘅麦当劳广告系用美国原版广告，以麦当劳卡通角色做系列式趣剧。我最钟意睇汉堡神偷用各种古怪方法喺滑嘟嘟同小飞飞身上偷汉堡，最后畀麦当劳叔叔捉住然后将汉堡分畀所有人。麦当劳叔叔就系小朋友嘅朋友仔，大家F  R  IE  N  D啲，无得好计，所以啲幼幼长长嘅薯条好唔好食都唔多计较，只在乎麦当当式欢乐气氛。后嚟终于有咗真正好食嘅扭纹薯条，可惜一年只有一个月有得食。至于肯德基，九十年代初喺香港登陆嘅时候中产味好重，而且价钱冇麦当劳咁大众化，同小朋友距离比较远。后嚟佢越嚟越街坊连粥同豆浆都有得卖系无人估到嘅。

        老窦成日话，麦当劳啲嘢无益。佢后生嗰阵喺上环铜锣湾一带返工，食过唔少真正由鬼佬整嘅真正用靓肉靓蔬菜做嘅汉堡包热狗，而且佢又唔睇麦当劳叔叔喜剧短片，当然对麦当劳冇兴趣。但系我同小学同学阿富，今时今日约出嚟，一样照旧去翻细个去嗰间麦记。人大咗，觉得去谂麦当劳啲嘢有冇益系好搞笑嘅事。每个小朋友都知道薯片、波板糖、碗仔翅、咖哩鱼蛋、肠仔系无益嘅，但系放学嗰阵总系唔食唔安乐。就算麦当劳、肯德基点样宣传佢地嘅食物有营养价值，我谂冇人真系当呢啲嘢系营养餐啩？对中学生同大学生嚟讲，唔少人随便买杯嘢饮，直接喺麦记做功课；好多剧社喺度开会度剧本，又有老细喺度面试员工。

        对好多人嚟讲，“食”只系麦记好唔显眼嘅一种功能，实际上我哋习惯将麦记当做长年开足冷气嘅屋企。我估，食材供应出事，麦记嘅人流量始终唔会少。食少个包，冷气照叹！